AMEA-nın  Torpaqşünaslıq və Aqrokimya İnstitutundaGənc Alim və Mütəxəssislər Şurasının  təşkilatçılığı ilə 2 Fevral – Gənclər Günü münasibətilə zoom platforması üzərindən tədbir keçirilib. İclası giriş sözü ilə Torpaqşünaslıq və Aqrokimya İnstitutunun elmi işlər üzrə direktor müavini a.ü.f.d. Qoşqar Məmmədov açıb və institutun gənclərini ürəkdən təbrik edərək onlara elmi fəaliyyətlərində uğurlar arzulayıb. Tədbirdə çıxış edən AMEA Gənc Alim və Mütəxəssislər Şurasının sədri, f.ü f.d Famin Salmanov Gənclər gününün MDB məkanında və Şərqi Avropa ölkələri arasında ilk dəfə Azərbaycanda qeyd olunmasını vurğulayaraq, Ümummilli lider Heydər Əliyev tərəfindən 1 fevral 1997-ci il tarixində “2 fevral – Azərbaycan Gəncləri Günü elan edilməsi haqqında” Sərəncam imzalandığını qeyd edib. F.Salmanov gəncləri respublika rəhbərliyinin onlara göstərdiyi qayğıya layiq olmağa çağırıb və institut gənclərini təbrik edrərək elmi fəaliyyətlərində uğurlar arzu edib. Torpaqşünaslıq və Aqrokimya İnstitutunun Gənc Alim və Mütəxəssislər Şurasının sədri Fərid Mustafayev çıxışında aparılan uğurlu gənclər siyasətindən danışaraq, onlara göstərilən xüsusi diqqət və qayğının,  gənclərin inkişafı ilə bağlı imzalanan fərmanların, sərəncamların və qəbul edilən qanunların Azərbaycan gəncliyinin inkişafı yolunda mühüm amilə çevrildiyini qeyd edib.  Daha sonra tədbirdə İnstitutunun Gənc Alim və Mütəxəssislər Şurasının sədr müavini Günay Məmmədova və Almaniyanın Helmholtz – Ətraf Mühit Tədqiqatlar Mərkəzinin doktorantı Vüsal Quliyev də çıxış edərək müasir Azərbaycan gənclərinin böyük vətənpərvərlik ruhu, işğal altında olan torpaqlarımızın düşmən tapdağından azad edilməsi əzmi ilə böyüdüyünü bildiriblər. Bunun nəticəsində rəşadətli Azərbaycan əsgəri doğma torpaqlarımızı qəhrəman əsgər və zabitlərimizin qanı və canı bahasına azad ediblər.  Sonda institutun elmi-ictimai fəaliyyətində fərqlənən  bir qrup gənc İnstitutun direktoru, akademik Qərib Məmmədov tərəfindən  diplom ilə təltif  edilib. Həmçinin gənclərə İnstitutun Həmkarlar İttifaqı Təşkilatı  tərəfindən pul mükafatı da təqdim edilib.