31 oktyabr 2017-ci il tarixində AMEA Respublika Elmi Tədqiqatların Əlaqələndirilməsi Şurasının Torpaq və Su Ehtiyatlarının İdarə edilməsi və Ətraf Mühitin Mühafizəsi Problemləri üzrə Elmi Şurasının növbəti iclası keçirilmişdir. İclasın gündəliyinə uyğun olaraq, akademik R.Məmmədov və AMEA-nın m.ü. A.İsmayılovun “Ətraf mühitin tədqiqində məsafədən zondlama texnologiyasından istifadə problemləri və NASA-nın regional layihələrində iştirak perspektivləri” mövzusunda cıxışları dinlənilmişdir. Çıxış edənlər, bu ilin sentyabr ayında Tbilisi şəhərində NASA-nın təşkilatçılığı ilə keçirilən konfrans haqqında ətraflı məlumat vermişlər. Bu konfrans, Global Observation of Forest Cover and Land Dynamics (GOFC-GOLD) proqramlarını əhatəedirdi. Ona görə də, müzakirə olunan regional layihələr əsasən meşə örtüyünün tədqiqinə yönəlmişdi. Azərbayacan nümayəndələrinin təklifi ilə, Qafqaz regional layihəsinin (Caucuses Regional Network-CaucRİN) Kür-Araz ovalığı landşaftının və torpaq örtüyünün tədqiqinə həsr olunması ideyası  bəyənilmişdir. NASA-nın bu tədbiri, inkişaf etməkdə olan ölkələrin alimlərinə peyk verilənlərindən istifadə imkanının genişləndirilməsinə xidmət edirdi.

Elmi Şuranın gündəliyində, ikinci məsələ  fəlsəfə doktoru və elmlər doktoru hazırlığı üzrə doktorant və dissertantların dissertasiya mövzularının müzakirəsinə həsr olunmuşdu. Müzakirə olunan 8 mövzu, aqrokimya (2), ekologiya (5), ətraf mühitin texnologiyası və mühəndisliyi (1) ixtisaslarını əhatə edirdi. Müzakirə olunan 6 dissertasiya mövzusu təsdiq edilmiş, 2 dissertasiya mövzusunda isə qismən dəyişiklik edilməsi haqqında qərar qəbul edilmişdir.